எக்காலமும் பொருந்தும் இன்னா + இனியவை நாற்பது - சகாய டர்சியூஸ் பீ

இன்னா+இனியவை நாற்பது

இன்றைக்கும் பொருந்தும் பாடல்களின் எளிமையான உரை

இன்னா நாற்பது, இனியவை நாற்பது என்ற இரண்டு தமிழ் இலக்கிய நூல்களுக்கு புதிய கோணத்தில் உரை எழுதலாமா என்று தென்கொரியாவில் பணிபுரியம் தமிழரான கவிஞர் சகாய டர்சியூஸ் பீ கேட்டார். நானும் நல்ல யோசனைதான் எழுதுங்கள் என்றேன். ஆனால், அந்த பாடல்கள் இந்தக் காலத்திற்கும் எப்படி பொருந்துகிறது என்பதையும் குறிப்பிட சொன்னேன்.

ஒரே சமயத்தில் துன்பம் தரக்கூடிய 164 செய்யக்கூடாத செயல்களையும், 124 இன்பம் தரக்கூடிய செயல்களையும் ஒரே சமயத்தில் இன்றைய தலைமுறையினர் அறிந்து கொள்ள முடியும் என்று நினைத்தோம்.

நாங்கள் நினைத்தபடியே உரை புதிய கோணத்தில் அமைந்துள்ளது. இனி மாதமிருமுறை இரு பாடல்களின் உரையை உங்களுக்காக தருகிறோம்... (ஆசிரியர்)

கடவுள் வாழ்த்து

மூலம்: 

முக்கட் பகவ னடிதொழா தார்க்கின்னா

பொற்பனை வெள்ளையை யுள்ளா தொழுகின்னா

சக்கரத் தானை மறப்பின்னா வாங்கின்னா

சத்தியான் றாடொழா தார்க்கு.

சொற்பொருள்:

முக்கட் - மூன்று கண்களுடைய (சிவன்)  

பொற்பனை - அழகிய பனைக்கொடி (பலராமன்)  

வெள்ளை - வெண்மை நிறம் கொண்டவன் (பலராமன்)  

சக்கரத்தான் - சக்கரப்படை கொண்டவன் (மாயோன்)  

சத்தியான் - வேற்படை கொண்டவன் (முருகன்)  

தாள் - திருவடி 

 விரிவான விளக்கம்:

முதலாவதாக, “முக்கட் பகவ னடிதொழா தார்க்கின்னா” என்பது மூன்று கண்களுடைய சிவபெருமானின் திருவடிகளை வணங்காதவர்களுக்குத் துன்பம் உண்டாகும் என்கிறது.

அறிவு, ஞானம், விழிப்புணர்வு ஆகியவற்றின் சின்னமாக சிவபெருமானின் மூன்றாவது கண் விளங்குகிறது. உயர்ந்த அறிவையும், ஞானத்தையும் மதிக்காதவர் வாழ்வில் பல தடைகளை சந்திப்பர். தெளிவான சிந்தனையும், நல்லறிவும் இல்லாத வாழ்க்கை குழப்பமும் துன்பமும் நிறைந்ததாக இருக்கும். ஞானத்தை நாடாதவர் அறியாமையில் மூழ்கி துன்பப்படுவர்.

இரண்டாவதாக, “பொற்பனை வெள்ளையை யுள்ளா தொழுகின்னா” என்பது அழகிய பனைக் கொடியையுடையவனாகிய பலராமனை (வெள்ளை நிறம் கொண்டவன்) நினையாமல் இருத்தல் துன்பம் தரும் என்கிறது.

பலராமன் வேளாண்மைக்கு, விவசாயத்திற்கு அடையாளமாகக் கருதப்படுகிறார். நிலத்தை உழுவதற்கான கலப்பையை ஏந்தியவர். உழவை, விவசாயத்தை, உழைப்பை மதிக்காமல் இருப்பது வாழ்வில் வளம் குன்றுவதற்கு வழிவகுக்கும். உழைப்பின் மதிப்பை உணராதவர் வாழ்வில் முன்னேற முடியாது. உணவளிக்கும் நிலத்தையும், உழவையும் மதிக்காதவர் பசியால் துன்புறுவர்.

மூன்றாவதாக, “சக்கரத் தானை மறப்பின்னா” என்பது சக்கரப்படை கொண்ட திருமாலை மறப்பது துன்பம் தரும் என்கிறது.

மாயோன் காப்பாற்றும் கடவுளாக போற்றப் படுகிறார். தர்மத்தின் பாதுகாவலராக மாயோன் விளங்குகிறார். நீதியையும், நேர்மையையும், பாதுகாப் பையும் மறப்பது வாழ்வில் பெரும் துன்பங்களை தரும். தர்மத்தை மறப்பவர் அதர்மத்தால் வீழ்வர். நீதியை மறந்தால் அநீதி தலைதூக்கும். பாதுகாப்பை மறந்தால் ஆபத்து உண்டாகும்.

நான்காவதாக, “சத்தியான் றாடொழா தார்க்கு” என்பது வேற்படை கொண்ட முருகப்பெருமானின் திருவடிகளை வணங்காதவர்களுக்கும் துன்பம் உண்டாகும் என்கிறது.

முருகன் வீரத்தின், அறிவின், ஆற்றலின் சின்னமாக விளங்கு கிறார். வீரத்தையும், துணிவையும், அறிவாற்றலையும் மதிக்காதவர் சோர்வடைந்து வாழ்வில் தோல்வியை சந்திப்பர். வாழ்க்கையில் எதிர்கொள்ளும் சவால்களை  துணிவுடன் எதிர்கொள்ளாதவர் எளிதில் துன்பத்தில் மூழ்குவர். அறிவாற்றலை வளர்த்துக் கொள்ளாதவர் வாழ்வில் முன்னேற முடியாது.

முக்கிய கருத்துகள்:

ஞானம், உழைப்பு, நீதி, வீரம் ஆகியவை வாழ்வில் அவசிய மானவை. இவற்றை மதிக்காதவர் பல துன்பங்களை சந்திப்பர்.

நீதி:

ஞானம், உழைப்பு, நீதி, வீரம் போன்ற பண்புகளை வளர்த்துக்கொள்ள வேண்டும். இவை இல்லாத வாழ்க்கை துன்பம் நிறைந்ததாக இருக்கும்.

இன்றைய காலத்திற்கான பொருத்தம்:

இன்றும் அறிவு, உழைப்பு, நீதி, துணிவு ஆகிய பண்புகள் மிகவும் அவசியம். அறிவை வளர்த்துக் கொள்ளாதவர் தகவல் யுகத்தில் பின்தங்குவர். 

உழைப்பின் மதிப்பை உணராத வர் வெற்றி பெற முடியாது. நீதியையும் நேர்மை யையும் கடைப் பிடிக்காதவர் சமூகத்தில் மரியாதையை இழப்பர். சவால்களை துணிவுடன் எதிர்கொள்ளாதவர் வாழ்க்கை யில் முன்னேற முடியாது. இவை இன்றைய காலத்திற்கும் பொருந்தும் நல்ல பாடங்கள் ஆகும்.

குடும்ப உறவுகள் - சுயமான வாழ்க்கை

மூலம்: 

பந்தமில் லாத மனையின் வனப்பின்னா

தந்தையில் லாத புதல்வ னழகின்னா

அந்தண ரில்லிருந் தூணின்னா வாங்கின்னா

மந்திரம் வாயா விடின்.

சொற்பொருள்:

பந்தம் - சுற்றம்/உறவினர், 

வனப்பு - அழகு  

அந்தணர் - துறவோர்

ஊண் - உணவு  

வாயாவிடின் - பயன் தராவிட்டால்  

விரிவான விளக்கம்:

முதலாவதாக, “பந்தம் இல்லாத மனையின் வனப்பு இன்னா” என்பது அன்பு இல்லாத மனைவியின் அழகு துன்பம் தரும் என்கிறது.

எந்த உறவிலும் அன்பு இருக்கவேண்டும் அது இலையென்றால் உறவு கசந்து போகும்.

பெரிய மாளிகை போன்ற வீடாக இருந்தாலும், உள்ளே உறவினர்கள், நண்பர்கள் இல்லையெனில் அது மகிழ்ச்சி தராது. உறவுகளின் அன்பும் பாசமும் இல்லாத வாழ்கை உயிரற்ற கூடு போன்றது.

இரண்டாவதாக, “தந்தை இல்லாத புதல்வன் அழகு இன்னா” என்பது தந்தை இல்லாத மகனின் அழகு துன்பம் தரும் என்கிறது.

தந்தையின் வழிகாட்டுதல் இல்லாமல் வளரும் பிள்ளைகள் முழுமையான வளர்ச்சி அடைவது கடினம். 

தந்தையின் அன்பு, பாதுகாப்பு, வழிகாட்டுதல் இவற்றை இழந்து வாழ்வது துயரம் நிறைந்தது. எவ்வளவு திறமை இருந்தாலும் நல்ல வழிகாட்டும் ஒருவரின் துணை இல்லையென்றால் அது வீண்தான்.

மூன்றாவதாக, “அந்தணர் இல் இருந்து ஊண் இன்னா “ என்பது துறவோர் வீட்டில் தங்கி உணவு உண்பது துன்பம் தரும் என்கிறது.

தியாகத்துடன் வாழ்பவர்களிடம் இருந்து ஒரு பொருளை  பெற நினைப்பது அவர்களுக்கு துன்பம் தரும். 

வறுமையில் வாழும் ஒருவரை மேலும் துன்பப்படுத்துவது பெரும்பாவம். எளியவரை மேலும் துன்பப்படுத்தி அவர்களிடம் இருப்பதை பிடுங்க நினைப்பது அநீதி ஆகும். 

நான்காவதாக, “மந்திரம் வாயாவிடின்” என்பது மந்திரச் சொற்கள் பயன் தராவிட்டால் அதுவும் துன்பம் தரும் என்கிறது.

முயற்சி செய்தும் பலன் கிடைக்காவிட்டால் அது பெரும் ஏமாற்றத்தை தரும். 

ஒருவர் நம்பிக்கையுடன் செய்யும் முயற்சிகள் வீணாகும் போது அது மன உளைச்சல் அதிகரிக்கும். பயன் தராத செயல்களை செய்வது  காலத்தையும் உழைப்பையும் வீணடிப்பதாகும்.

முக்கிய கருத்துகள்:

உறவுகளின் முக்கியத்துவம். குழந்தை வளர்ப்பில் தந்தையின் பங்கு. பிறர் துன்பத்தில் பங்கு கொள்ளாமை. நம்பிக்கை வைத்ததில் பலன் கிடைக்க வேண்டியதன் அவசியம்.

நீதி:

உறவுகள், குடும்பம், சுயமுயற்சி, நம்பிக்கை இவை வாழ்வில் முக்கியமானவை. இவற்றில் குறைபாடு இருந்தால் வாழ்வு துன்பமயமாகும்.

இன்றைய காலத்திற்கான பொருத்தம்:

இன்றும் குடும்ப உறவுகள் முக்கியம். குழந்தை வளர்ப்பில் கணவன், மனைவி இருவரின் பங்கும் அவசியம். பிறரை சுமைப்படுத்தாமல் சுயமாக வாழ்வது நல்லது. நம்பிக்கையுடன் செய்யும் முயற்சிகள் பலன் தர வேண்டும். இவை இன்றைய காலத்திற்கும் பொருந்தும் நல்ல பாடங்கள் ஆகும். •

(தொடரும்)